JASO RANTAUNET
Kato guru ngaji
“Ampek tando urang Minang
Pasurau
Parantau
Palapau
Pagurau”
Tamanuang den nan sadang dirantau
Ciek jo duo tando dun
Lai sato den
Kok ndak cukuk tando dun di den
Tantu ndak rang Minang den du?
Bukan den ndak namuah
Cubolah pikia
Kapai den ka surau
Surau nan saroman dikampuang
Sasudah sumbayang
Basambuang jo mangaji
Kama ka den cari di rantau?
Kalaupun ado
Mungkin jauah tampekno
Kapai den kalapau
Lapau saroman dikampuang
Minun teh talua
Makan katan jo goreng
Sambia ma ota kian kamari
Kama kaden cari?
Kalaupun ado
Mungkin jaquah tampekno
Ha tapikia lo di den
Palanta rantaunet
Tampek bakumpua rang Minang
Nan tinggano di 8 panjuru angin
Sajak aden sato kalapau
Banyak nan dapek diden
Kadang saraso kasurau
Dapek kaji dari ahlino
Kadang saraso kalapau
Mambaco kuliner sato capak-capak-i
Dapek Guru
Indak sumbarang guru
Dapek ilmu
Dari babagai macam ilmu
Dapek kawan/sanak
Walau jauah dimato
Taraso dakek di hati
Dapek babagai kasampatan
Kasampatan mambaco
Kasampatan manulih
Kasampatan badiskusi
Kasampatan bagurau
Dapek berbagai ungkapan
Ungkapan ikuik basuko cito
Ungkapan ikuik baduko
Ungkapan salamaik hari rayo
Dan ungkapan lainno
Dapek berbagai kiriman doa
Doa mohon restu
Doa mohon kesembuhan
Doa mohon keberhasilan
Doa-doa lainnya yang indah
Nan paliang sanang ati mandanga
Banyak diantaro warga palanta
Alah bibasuo di dunia nyata
Sadono bagumbira ria
Taraso alah kenal sajak dulu kala
Ado pulo nan tanyato
Basangkuik pauik dari sonono
Itulah salayang pandang
Diantaro jaso-jaso rantaunek
Nan mambuek urang minang
Indak kahilangan tando nan ampek
Bengkulu, 25 Maret 2010
Hanifah Damanhuri
