MAMALANG BALUK

MAMALANG BALUK

Latak rumah den nan dikaliliangi aia
Aia tabek, aia swah, aia banda
Mambuek anak laki-laki acok mamalang
Dakek rumah den
Kadang di banda ketek teras rumah den
Katiko banda dun alun basimin abih

Si Ita kawan/sanak den nan alah piatu
Nenek mularaik pulo
Pandai pulo mamalang bantuak anak laki-laki
Mainno kalaman den
Di tunjuakkanno den baa carao mambuek palang
Bamasuakkan papeh ka banang nilon
Ba plintir-plintir banangdun ka kaki
Sahinggo banang palang jadi kuaik
Di galino tanah dakek dapua den nan lambok
Di kumpuakanno caciang nan dapek
Caciang di pasang ka papeh njik umpan
Karajoa den mamandua sen
Kama si ita pai bairiangkan

Di paresono banda ketek di teras rumahden
Katiko nampak lubang
Tangan di ita denagn lincah
Mamuta-muta palang supayo masuak lubang
Sambia muncuang babunyi ck ck ck ck ck
Kok lai mujua
Dapek baluk
Aden gali-gali garik mancaliak baluk dun
Badanno licin dan lia sangaik
Sabalun di lapehkan papeh
Baluk dun di lacukkan dulu ka tanah
Alah telerno baru papeh di lapeh
Sudah dun balukgon diatua jo paatua
Paatuagon dari bungo rumpuk
Lupo den namono
Kadang-kadang den salang palang si ita
Den cuboan pulo mamasuakkano ka lubang
Sambia babunyi ck ck ck ck ck
Tapi indak pernah mancatuh doh
Mungkin dek agen garik-garik gali
Mancaliak baluk gon kali
Garik lo baluk dun ka den he he he

Salamo aden dikampuang
Iyo ndak nampak di den rang gaek
Sato mamalang doh
Antahlah kalau di ngarai
Ndak Nampak di urang banyak

Tuhan nan kamaizinkan
Bantuak itu kareh hiduik si Ita katiko ketek
Katiko alah gadang
Dek rajin bausaho
Kini RM Jam Gadang
Khusus manjua nasi goreng jo soto
Alah bakambang jadi tigo lokasi
Dunsanak tatumpangkan
Urang lain dapekm karajo
Anak-anak basiko tinggi

Tu mah dek untuang ka mujua
Di kiro indak ka ado urang kamanjago
Katiko badan tabujua di rumah sakik
Si Desi anak si Ita nan tuo
Bajago malam di bagian kabidanan
Batugaih sabagai bidan
Sato mamasang dan mamonitor infus den
Alhamdulillah
Baruntuang bana den taraso


Bengkulu, 17 Maret 2009

Hanifah Damanhuri