SARIKAYO TALUA
Latak rumah wak nan strategis
Bisa dicaliak dari manosen
Jendela ruang tamu nan kaco
Kalau ado tamu
Nampaksen dari jauah
Kalau nampak di awak ado tamu karumah
Awak baranti main dan pulang karumah
Sampai dirumah awak caliak
Sia nan jadi tamu
Apo kue untuak tamu
Adiak wak mantun lo parangaino
Kok lamak kue nampak
Kami jadi anak manis dirumah
Kue dun kami caliak-caliak jauh senlu
Katiko tamu alah turun dari rumah
Tanpa di aba-aba
Kue nan tasiso kami serbu
Pasti tandeh sacah dun juo
Malam hari jelang mama maningga
Kalimo anak mama nan hiduik
Tambah si Dilla nan masih ba umua 3 tahun
Bakumpua mangawankan mama di RSU Padang
Alah lamo kami indak bakumpua sadono mantun
Datanglah kawan uni Fat mambao bungkusan
Begitu kawan uni Fat pai
Reflek Nami manyemba bungkusan dun
“ Iko untuak awak apo indak ?
Kalau katinggalan ? “
Tagalak-galak kami mengana laku dikampuang
Galak nan sampai kalua aia mato
Lupo kalau dikamar lain
Ado pasien nan sekarat
Mantunlah suasana malam terakhir basamo mama
Bisuakno kami berurai aia mato
Indak kabasuo lai jo mama nan tacinto
Kalau jauah hari mama tau
Bakal ado tamu istimewa
Nan akan datang karumah
Salah satu makanan nan dibuek mama
Adolah katan jo sarikayo
Mambuekno murah, lamak rasono
Sadiokan dandang
Isi jo aia jarangkan
Aduak 6 butir talua, santan kental dan gulo anau
Dalam wadah nan tahan angek
Masuakan kulik manih, cengkeh palo
Nan alah baaluhkan
Masuakkan vanile, garam, daun pandan
Kukuih sampai kambang
Alah masak taraso
Matikan kompor
Kalau bulan puaso nampak di awak
Mangkon bantuak sarikayo nan di jua urang
Sarikayo di buek jo gulo putiah
Di agiah aia perasan pandan/sugi
Di agiah vanile
Pakai cetakkan diameter 3- 4 cm
Di aleh jo karateh roti
Bagian bawah linyakkan katan
Di ateh katan gon di tuangkan adonan
Lalu di kukus
Sangaik lamak dan sangaik cocok
Untuak arisan kaluarga
Bengkulu, 13 Maret 2009
Hanifah Damanhuri
Kamis, 12 Maret 2009
Langganan:
Posting Komentar (Atom)
Tidak ada komentar:
Posting Komentar
Saya tunggu komentar anda