ANAK-ANAK KAMPUANG
Adaik salingka Nagari
Mamiliki tali kakarabatan nan tinggi
Apoli katiko aturan babini
Indak buliah kalua dari salingka Nagari
Kalau dapek padusi calon bini
Anak bako atau anak mamak sandiri
Atau nan masih bahubungan famili
Atau karib karabat salingka Nagari
Anak-anak nan lahia di kampuang
Bebas bamain sakaliliang kampuang
Sangaik akrab jo urang sakampuang
Kalau nasib lagi baruntuang
Amai urang saraso induak kanduang
Dapek patuah indak tangguang-tangguang
Tantang adaik nagari nan bakanduang
Mantun caro panurunan adaik balansuang
Dulu katiko kandaraan alun sabarapo
Listrik dan Televisi alun ado
Maso anak-anak lain indahno
Mamadek labuah basamo-samo
Sagalo pamainnan babuek sajo
Saroman oto-otoan dari limau jawo
Pestol-pestolan dari tami di rimbo
Gasiang banang dari tutup boto
Ondeh kok takana wakatu jolong gadang
Saliang batandang sasamo gadang
Maota sambia manyulam salendang
Parintang-rintang hari di libur panjang
Kalau indak sadang libur panjang
Maulang palajaran manjadi alasan batandang
Padahal labiah acok maota gadang
Kadang indak taraso ari alah parak siang
Jikok tadanga nyanyi “Si Nona”
Taraso malu hati mandanga
“…….
O malala jan lah malala juo
Harilah sanjo
O marilah marilah kito pulang
Harilah patang
Awak rancak
Budi elok
Baso basi
Pamikek hati”
Bengkulu, 7 Mei 2010
Hanifah Damanhuri
